الامتحانات

من قصيدة أواخــر الـشـتــا





للشاعرة/ إليسا أبو ماضى





كنا فى أواخر الشتا قبل اللى فات


زى اليومين دول عشنا مع بعض حكايات


أنا كنت لما أحب أتونس معاه


أنا كنت باخد بعضى واروح له من سكات


أجب عن الأسئلة التالية:
1- علام يدل التعبير بصيغة الماضى؟ ولماذا اختصت الشاعرة الشتا قبل اللى فات؟
2- فى أى فصل من فصول السنة كتبت هذه القصيدة؟ (مستدلا على ما تقول)
3- علام يدل التعبير (أنا كنت باخد بعضى وأروح له من سكات)؟
4- أيهما أفضل (أنا كنت باخد بعضى) أم (أنا كنت باخد تاكسى)؟ ولماذا؟
5- اختر الإجابة الصحيحة مما بين القوسين:
- الجمال فى قولها (عشنا - معاه): (تصريع - جناس - حسن التفات)
- (أروح له من سكات) المقصود ! بها: (دكاكينى - دحاليبى - ذرابيئى)
- مصدر كلمة (أتونس): (تَوَنًّس - تُونِس - تَنَاسَى)
- (زى اليومين) مجاز مرسل علاقته: (الكلية - المدرسة - الحضانة)



*****


والناس فى عز البرد يجرو ويستخبو


وأنا كنت باجرى وأخبى نفسى قوام فى قلبه


ولحد لما الليل يليل بابقى جنبه


وأفضل فى عز البرد وياه بالساعات


أجب عن الأسئلة التالية:
1- هات من الأبيات مضاد (النهار), وكلمة تؤدى معنى (معاه)
2- يرى بعض النقاد أن تكرار (فى عز البرد) أضعف المعنى. وضح ذلك مبينًا رأيك.
3- إلى أى مدرسة شعرية تنتمى الشاعرة؟ وما أهم سماتها؟ (بدون غلط)
4- هل ترى أن هناك علاقة بين (عز البرد) و (عز الدخيلة)؟ أم أنها تشابه أسماء؟!
5- أيهما أفضل (ولحد) أم (ولغاية)؟ ولماذا؟



*****


على سهوة ليه الدنيا بعد ماعشمتنا


وعيشتنا شوية رجعت موتتنا


والدنيا من يوميها ياقلبى عودتنا


لما بتدى حاجات قوام تاخد حاجات


أجب عن الأسئلة التالية:
1- اختر الإجابة الصحيحة مما بين الأقواس:
- (على سهوة) تفيد: (السرعة - العجلة - الموتوسيكل 'البجاج الهندى أبو 7')
- (عيشتنا - موتتنا) تفيد: (التضاد - التأكيد - الحيرة فى اتخاذ القرار فى السقعة)
- كلمة تؤدى معنى (شوية): (بعضشى - حفان - قيمة مقطف)
- المقصود بـ (يوميها) فى الأبيات: (يوم العاركة - يوم الخناقة - يوم الكرامة)
2- اشرح الأبيات شرحًا مفصلا باختصار.
3- أيهما أفضل (ياقلبى) أم (يانضرى)؟ ولماذا؟
4- يتضح فى الأبيات أن (الدنيا ملهاش أمان .. خالص). وضح ذلك مستدلا على ما تقول.
5- استخرج من الأبيات مايدل على:
- عشمنى بالمحبة وشعلقنى بالهوا، حايلته حبة! حبة زودها واتلوى.
- زألطنى الحب زألوط، نمت فى بنها صحيت فى أسيوط.



*****

وسط الشوارع ناس كتيرة مروحين


والناس ياقلبى هما هما وهو فين


وأنا ماشية باتلفت وباسأل كل يوم


بيعمل إيه دلوقتى وبيحلم بمين


أجب عن الأسئلة التالية:
1- يتضح فى الأبيات الشوق اللهفة وتطلع الشاعرة لرؤية (اسم النبى حارسه). اشرح
2- يؤخذ على الشاعرة (وأنا ماشية باتلفت). وضح ذلك مبينًا مدى التعارض مع قواعد المرور.


بمناسبة ان ابنى فى الشهاده الاعداديه عجبنى جدا طريقة امتحان للغة العربية عام 2010 ما اسهله وعايزة رايكم معايا

سوسو
جميله الكلمات ولأنسان جميل وكل المعانى الموجوده بها من أجمل ما سمعت
وبجد الفكره حلوه ومحتاجين ردود عليها وأجابات على كل ما تتضمنه القصيده
شكرا لمجهود الرائع وللفكره الجيده تقبلى تحياتى ومرورى

هههههههههههههههه
بجد حلوة جدااا
تصورى انى كنت بحب الغنوة دى جداااا
بيتهيئلى بعد الكلام ده .............هحبها اكتر هههههههههههه
اهم حاجة ربنا ينجح لك ابنك وابنى وكل اولادنا واخواتنا
وان شاء الله سنة سعيدة يارب على الجميع
اما الاسئلة فانا عجبتنى جدا ونفسى اجاوب عليها كلها
بس لو يرجعونى الاعدادية.......... ياه كنت جاوبت
ههههههههههههههه
شكرااا للموضوع الرائع ومنتظرين المزيد

اشكرك استاذ فتحى و اختى مصريه على ردكم اللذيذ بس كان نفسى اى حد يحل لى الاسئله لانها صعبه شويه عليا تقريبا انا كنت سارقة الاعداديه هههههههههه

حبلغ عنك
يا منى فيه حد بيعترف أنه سرق الأعداديه
تعالى نبلغ عنها وربنا يستر انا شاهد
تقبلوا تحياتى هههههههههههههه

ههههههههههههههه شكلى تانى هروح اضمنك انتى كمان ياسوسو
طيب عندى حل
اهربى بالاعدادية بتاعتك على برا
ههههههههههههههه وانا هحصلك بالابتدائية القديمة
منورة بجد اختى الغالية

اشكرك حبيبتى مصريه بس ممكن نهرب جوا حبيبتنا اللى غاليه قوى على قلوبنا اللى اسمك من اسمها منور زيها مصر ام الدنيا لك ارق تحياتى

مالنا ابداا مكان غيرها اختى الغالية
ربى يحفظها ويحميها من كل شر
تسلمى اختى الحبيبة وكل تمنياتى بالنجاح والتوفيق لابنك وان شاء الله سنة جميلة للجميع

بجد موضوعك جميل اوي
وفكره الاسئله علي الاغنيه دي جديده
انا ممكن احل شويه منها مش كلها

4- أيهما أفضل (أنا كنت باخد بعضى) أم (أنا كنت باخد تاكسى)؟ ولماذا؟
انا من راي (أنا كنت باخد تاكسى)
علي اساس ان التاكسي اسرع

3- علام يدل التعبير (أنا كنت باخد بعضى وأروح له من سكات)؟
يدل علي انها خايفه لحد يشوفها

(أروح له من سكات) المقصود ! بها: دكاكينى

(زى اليومين مجاز مرسل علاقته:الكلية - المدرسة
فتره امتحانات

- هات من الأبيات مضاد (النهار),
الليل

- يرى بعض النقاد أن تكرار (فى عز البرد) أضعف المعنى. وضح ذلك مبينًا رأيك.
من كتر ما انا بسمع الاغنيه جالي برد


- إلى أى مدرسة شعرية تنتمى الشاعرة؟ وما أهم سماتها؟
مدرسه الشتا
سماتها جوها معتدل

علاقة بين (عز البرد) و (عز الدخيلة
تشابه أسماء؟!
الفرق ان ده من اب وده من اب

على سهوة) تفيد
السرعة

(عيشتنا - موتتنا) تفيد:
الحيرة فى اتخاذ القرار فى السقعة

المقصود بـ (يوميها) فى الأبيات
يوم الخناقة

شرح الأبيات
بعد الدنيا ما بتعشمنا وتدينا حاجه بنبقي مبسوطين بيها اوي نعيش مع الحاجه دي
لكن بسرعه تيجي الدنيا تاخد مننا حاجات قصاد الحاجه دي وتموتنا
ده راي

يتضح فى الأبيات أن (الدنيا ملهاش أمان .. خالص

تعيشنا شويه وبعدين ترجع تموتنا
ولما بتدينا حاجه تاخد قصادها حاجات

يؤخذ على الشاعرة (وأنا ماشية باتلفت
طبعا لازم تاخد مخالفه

امتحان طوووووووووووويل اوي وصعب جدااااااا
امال امتحان الثانويه هايبقي عامل ازاي

ههههههههههههههه
إيه الامتحان اللذيذ ده
ياسلام لو الوزارة وضعت الامتحانات للتلامذة في المواد دي
كله هيجيب الفل مارك .. العلامة الكاملة
حتى نفس الناس هتتفتح
اللي مش متعلم هيتعلم
واللي اتعلم .. هيتعلم تاني
على فكرة أنا فتنت عليكي وبلغت إنك سارقة شهادة الإعدادية
وقرروا إنهم يمتحنوكي تاني من أول وجديد .. من أول أولى إعدادي
ههههههههههههههه

------------------------
أدعو الله بالنجاح والتوفيق لبناتي ولأبنائكم جميعا
ربنا يهديهم ويكرمهم ويحقق أملنا فيهم
ويجعلهم صالحين
رائعة أختي الفاضلة كعادتك دائما
تقبلي تحياتي وتقديري

اعدادية مسروقة وابتدائية قديمة هههههههههههههههههههههههههههههه
البلد دى باين عليها بلد شهادات
وانا مش عارف اتعامل مع المثقفين دول بصراحة
امتحان حلو ويارب ينجح ابنك وابنها وبناتك وابنى كمان
ربنا يوفق كل الطلبة

بجد امتحان جميل اوى اوى يا اختى سوسو
وربنا ينجح ابنك وابن مصرية وكل الناس

بس حكاية الاعدادية المسروقة دى
متخافيش منها خالص
الدنيا مليانه ناس سارقة الدكتوراه
يعنى مش هتهمهم اعدادية ولا هى الدنيا مبتجيش الا على الغلبان
انا لو مكنتش نجحت فى الاعدادية كنت دخلت الامتحان ده
بجد جميل اوى شكرا لكى

اشكركم جميعا وتمنياتى للجميع بالتوفيق