لعله خير يامولاي

السلام عليكم ورحمة الله وبركاته أحبائي الكرام
الحدوتة دي قريتها في موقع على النت وعجبتني جدا وحبيت أنقلها لكم وياريت كلكم تقرأوها وتستفيدوا منها لأنها بجد حدوتة جميلة جدا
----------

لعله خير يامولاي ( حدوته )

نبدأ ونقول كان ياماكان كان زمان كان فيه ملك والوزير مؤمن المخلص للملك جدا ، كان الوزير يحب الملك اكتر من روحه ومستعد يفديه بروحه وكان الوزير اسم علي مسمي مؤمن وهو عنده من الإيمان بالله كتير.

المهم وفي يوم من الأيام فجأه الأبن الوحيد للملك مات طبعا زعل وانهار فمؤمن يقوله لعله خير يامولاي يستغرب الملك ويقوله موت ابني الوحيد خير يقول مؤمن طبعا ويحكيلوا قصة الولد الي الخضر قتله في سورة الكهف ويقوله يمكن يكون كان عاق زي الولد دا ربنا يخلفك خير منه يامولاي واقتنع واهتدي الملك.

وبعد شهر والدة الملك ماتت طبعا برده زعل وانهار قاله لعله خير يامولاي قال له برده ازاي موت امي خير قال له هي دلوقتي ميته راضيه عنك ممكن لو كانت فضلت موجوده اكتر من كدا كان يحصل حاجه تخليها تغضب عليك هدي واقتنع.

وبعد شهر عم الخراب علي البلد والبلد اتدمرت طبعا انهار وزعل وقال الخراب الخراب قاله مؤمن لعله خير يامولاي قاله برده قاله ايوة دلوقتي كل الشر راح نقدر دلوقتي نبني بلد علي هوانا كلها خير وامان وإيمان اقتنع وقاله ماشي.

وبعد شهر كان الملك بياكل تفاحه وفجأه صباعه الي فيه خاتم الملك انقطع صرخ الملك وزعل وكان زعله مش علي صباعه ولكن علي خاتم الملك لأن دي حاجه كبيرة في الملك طبعا كالعاده مؤمن قال لعله خير يامولاي انهار الملك وقال كله الا خاتم الملك انت انسان شر ارموه في السجن.

والتفت من حوله الحاشيه الشر بعد سجن مؤمن واخذوا الملك في نزهه خارج القصر وذهب الملك لكي يصطاد حتي ينتهوا من تحضير الغذاء وفجأه وهو بعيد عن الحاشية الفاسده وقع في قبيله من آكلي البشر وبدأوا بصلبوه من اجل ان يأكلوه وفجأه عندما وجدوا اصبعه مقطوع تركوه ورموه ولم يأكلوه لأنه فال وحش عندهم لازم الفريسه تكون كامله لأن كدا يبقي شؤم عليهم.

طبعا جري بسرعه وذهب للحاشيه وقال لهم نذهب للقصر فورا ياخوانا واول ما دخل القصر سأل علي مؤمن وجابه وحكي له ما حدث وقاله كلامك مضبوط وطلع قطع صباعي خير وقاله قولي يامؤمن ايه بقي الخير في حبسك واهانتك كدا قاله لعله خير يامولاي قاله برده طب ازاي قاله انا بحبك وملازمك وعمري ما اسيبك ولو كنت جيت معاك النزهه كنت هاجي معاك وانت بتصطاد فكانوا هيسبوك لأن صباعك مقطوع ويكلوني انا لأني سليم ومفيش فيا حاجه مقطوعه فكدا ربنا نقظني بالسجن يبقي لعله خير يامولاي.

قاله صح يامؤمن وكل حاجه ربنا يجبها خير امنت وسلمت يامؤمن

( يارب كلنا نسلم زي مؤمن والملك بتاعه ان ربنا كل حاجه بيجبها خير ربنا يعينا علي كل الي يجيبه ونكون دايما راضيين قولوا امين ).

يارب تكون القصه عجبتكوا واستفتدوا منها وياريت كل الي يقرأها يحكيها لكل اللي يعرفه علشان نفهم ونستفيد

والله المعين