من خواطري : شــيء غريب

شيء غريب
لما الحبيب
هو اللي يجرح قلبنا
وان الدوا
لجرحنا
ولقلبنا
يكون على إيدين الحبيب

شيء غريب
لما تحس بشيء غريب
زي اللهيب
يحرق في قلبك
وانت عايز
تشتكي
بس عاجز
إن صوتك يتسمع
ويحس قلب بالوجع

شيء غريب
لما تتوه بينا الأيام
لما نضيع وسط الزحام
لما نعاني م الآلام
لما بيهجرنا الحبيب

شيء غريب
لما ينسانا الزمان
وسط الجراح
وسط الهوان
ونعيش
نفتش ع الأمان
ومنلقاهوش

شيء غريب
لما ابتسامتك
تختفي من فوق شفايفك
لما دموعك
تملا عيونك
وانت محتار تعمل إيه
تشكي لمين
تحكي لمين
وتقول له إيه .. وللا إيه
شيء غريب

لكن الحبيب
والطبيب
اللي يطيب جرحنا
هو إيماننا بربنا
يهدينا .. يصلح أمرنا
يعيننا .. ويزيد صبرنا
يسعدنا .. ويكون جنبنا
وبكده .. مايكونش أبدا
شــيء غــريب

سعيد القاضي

الله الله الله
شىء جميل انك موجود وسطنا
وكل يوم بتقدم اللى بنحبه ويحبنا
ووجودكم خلا شكل للمنتدى
ودايما بكم ومعكم نعيش فى هنا
شكرا حبيبى على موضوعك الجيد
والرائع تقبل تحياتى

شكرا أخي الحبيب على مرورك الرائع وكلماتك الجميلة وتشجيعك
تقبل تحياتي وتقديري