مصر عايزه زأه

موضوع: مصر عايزه زأه الأحد ديسمبر 23, 2012 3:01 pm

مصر محتاجة زأه
صعب عليا
أنادي عليكي ... ومش سمعاني
ولا حساني ولا عرفاني
وتبقي معايا ومش شيفاني
مالك يا بلدي
حالك مش عاجبني
ودايما شاغله فكري
كنتى فى عيونى الفرحة
علي فين يا بلدى رايحة
فين صوتك فين الصايحة
فى الفجر كنتي بتصحيني
أخرج قبل معادى بساعات
عشان زحمة الإشارات
ودوخه ومواصلات
وأرجع متهد حيلي
ودموعى على خدودى
معييش اللى يكفينى
وإن يوم يعلي صوتى
يبقي بالنسبالي موتي
***
بندور ونلف فى ساقية
والساقية معانا دايرة
والميه ياريتها كافية
لغيرنا بتكفيهم
وبتوصلنا بالعافية
وم التعب أنام مش داري
والجدع يعرف يصحيني
***
زهقت من المدينة والزحمة
وقلت أروح لهدوء القرية
ألاقي الخضرة ونفوس صافية
لقيت الفلاح من حاله بيشكى
ونتاج الأرض ما عاد يكفي
والزرع أتغير لونه وشكله
وهمي على همهم يبكي
***
حتى المصانع والمآذن العالية
صوت المكن كان بيغني يا غالية
سنين تركوه عشان يبيعوه
سكت صوته وشغال بالعافية
أصل العمال ملهمش لازمة
واللى يتكلم ياخد بالجزمة
***
على فين يا بلدي رايحة
على شموخك وتاريخك
ولا علي المجهول رايحة
صوتك كان دايما مسموع
واليوم صوتهم بقي عالي
ضجيج خلاكي مش سامعه
ولا حتي أهاتك طالعه
ولا كلمة أه لقلوبهم واجعه
***
جه اليوم تترجي ولادك
اللى نهبوكي وسرقوكى
ومديتي ليهم إيدك
محتاجه منهم زأة
للأسف قالوك لأة
والغلبانين الشأيانين
من التعب صبحوا هزلانين
ومش قادرين يدوكي زأه
***
الخطة واضحة يا بلدى
الشعب يفضل جعان
والجهل فى كل مكان
والمرض ملوش دوا
ويلبسونا قميص الجنان
ونموت زى الفران
دا الموت أصبح راحة
من الظلم والطغيان
***
يعني مفيش فايده فيكم
جوعنا مش مكفيكم
وصحتنا هانت عليكم
والجهل من صنع ايديكم
انتم أية
ملقتوش اللى يربيكم
وتاخدوا اللى يكفيكم
دا اللى يفيض من بلاويكم
يخلي الشعب يعيش فى أمان
***
الرسام ما عاد يبدع زى زمان
والفنان أصبح لفنه زى السجان
والمثقفين لازم يقيدوا اللسان
والعلماء ملهمشي فى بلدنا مكان
والمدرس طول اليوم من بيته هربان
والطبيب إزاي يعالج وهو اللي عيان
***
نفسي أسمع جواب منكم
أمته حقوقنا ترجع لينا تاني
ونعرف مين علينا الجاني
ومين السبب فى قتل أخوانى
ومين فى السجون راماني
مين من الهم سهرني وصحاني
حقنا مش ح نسيبة
والله حقنا ح نجيبة
ومصر ترجع لينا من تاني
فتحى صفا