ليست مجرد غنوة

أغنية قديمة بس بتعجبنى وتشدنى جدااا
ولا ارى فيها مجرد غنوة
اجدها تمثل لى شيئاً ما... وربما عدة اشياء
انقل لكم كلماتها
واتمنى ان تقرأوها جيداا
ربما وصلت الرسالة... لمكانها الصحيح

الغنوة اسمها... يامصرى..... بصوت على الحجار

,,,,

يامصرى ليه دنياك لخابيط.... والغلب محيط
والعنكبوت عشش عالحيط.... وسرح عالغيط
يامصرى قوم هش الوطاويط...كفاياك تنطيط
صعبة الحياة والحل بسيط... حبة تخطيط

,,,,

فتحت باب استيرادك
وصرفت فوق ضعف ايرادك
حلى للخواجة استكرادك
سابك بتقرأ فى أورادك
وده أشطك... ونزل تشفيط

يامصرى ليه دنياك لخابيط... والغلب محيط
والعنكبوت عشش عالحيط... وسرح عالغيط

,,,,,

ومهولاتى تحب تصيت
ساعة الفرح زغاريط تنطيط
وفى المياتم هات ياصويت
وفى المظاهرة سخن تشيط
وفى الانتخااب..
تنسسى التصويت

يامصرى ليه دنياك لخابيط.... والغلب محيط
والعنكبوت عشش عالحيط... وسرح عالغيط

,,,,

وليه بترشى وتتساهل
وتضيع حقوقك بالساهل
تستاهل النار تستاهل
ياغويط ويحسبك الجاهل
ساكت وساهى ...
وغبى وعبيط

يامصرى ليه دنياك لخابيط... والغلب محيط
والعنكبوت عشش عالحيط... وسرح عالغيط

,,,,

يامصرى ياالى الغلاء عصرك
والنهب فى عصرك حاصرك
قوم للحياة وإسبق عصرك
ولا حاجة هترجع مصرك
إلا أن تكون...
شغااال ونشـــيط

,,,,


يامصرى ليه دنياك لخابيط...والغلب محيط
والعنكبوت عشش عالحيط... وسرح عالغيط
يامصرى قوم هش الوطاويط... كفاياك تنطيط
صعبه الحياة والحل بسيط... حبة تخطيط

اى رأيكم اخوانى واخواتى؟؟؟
فهمتوا حاجة؟

الله يا أختي الغالية ..
على هذه الغنوة الرائعة المعبرة الجميلة

أنا أرى أختي .. أن هذه الغنوة هي تجسيد لواقع أليم .. ومرير ..
نعيشه من سنوات
..
وبما أننا شعب معروف بالأصالة وحب العشرة
فلا يهون علينا أن نهجر هذا الواقع الأليم .. والمرير

وبما أننا شعب .. نعشق السلبيات.. ونتلذذ بالشكوى
فتمر بنا سنوات وسنوات .. لا نصلح السلبيات .. ولا نمل من الشكوى

هذا الواقع الأليم .. والمرير
شخصته هذه الغنوة الرائعة
في الأمور التاليــــة :

- عشقنا للارتجالية في الأداء .. والبعد عن اتباع التخطيط العلمي
- عدم الاعتماد على الذات .. واستيراد معظم احتياجاتنا من الغير .. حتى صار هذا الغير .. يتحكم فينا وفي مقدراتنا
- الحرص على الشكليات في الأداء .. واتباع خصال المنافقين .. والبعد عما فيه المصلحة للفرد والمجتمع
- تفشي الفساد في المجتمع من رشوة ومحسوبية .. واستساغة هذا الأمر لدرجة أن الرشوة صارت هي وسيلة الحصول على الحق المشروع

وفي ختام الغنوة .. دعوة إلى محاربة هذا الواقع الأليم .. بالجد والاجتهاد في العمل

وكالعادة أختــــي
كل نقد هادف وبناء .. وكل دعوة رائعة للنهوض .. مثل هذه الغنوة الرائعة
تذهب أدراج الرياح

وكما قال المثل الشعبي .. وكأنك يابو زيــد .. ماغزيت .. ولا رحت ولاجيت

إيه رأيك يا أختي .. ياترى أنا بكده أكون فهمت حاجة ؟

اختياراتك كلها رائعة أختي الحبيبة كما عهدناكِ دائماً

تقبلي تحياتي وتقديري..

اه حلوة اوى خالص بسمعها كتير
ومع انها مش جديدة لكن بتوصف الحال دلوئتى
انا شايفة ان كل كلمة فيها صح بصراحة
وعلى الرغم انه بيتكلم عن سلبيات كتير بس فيه ايجابيات كتير شايفها الكاتب فى المواطن المصرى
اهم السلبيات الانفعال الزيادة المبالغ فيه دايما بنبالغ فى انفعالاتنا بالذات لو اختلفنا مع شخص بنحوله لعدو كل همنا ننتقم منه
وده وحش موت
والحل من وجهة نظر الكاتب وانا موفقاه التغيير بالفعل بيتهيئلى لو كل واحد غير نفسه نتغير كلنا
حلوة الاغنية موت عايزين نقد كتير لسلبياتنا عشان نتغير
مرسى ليكو

اللــــــــــــه على الاغانى والمعانى
فعلا مش مجرد اغنية
بحبها جدا وبسمعها كتير زى سالمينا ههههههههههه
بس للاسف كنت فاكر انها من اعمل سيد درويش
طبعا اخى الحبيب سعيد وسالمينا جابو المفيد
لكن ميمنعش انى ادلو بدلوى ههههههههههه حلوة دى
هو احنا كده زى ماقال بالظبط
نهيص فى الافراح والمياتم والمظاهرات وننسى حقنا فى الانتخابات
ندفع الرشوة عشان ناخد حقنا وفاكرين الاسلام اننا نقعد نقرأ الاوراد ونسيبهم يسرقونا
طبعا مش كلنا لكن اغلبنا
والحل اننا نبطل هيصة وكلام ونشتغل وكل واحد يقوم بدوره
صح ياميس؟ ههههههههههههه
بس لازم اضيف حاجة ومفيش فيها اى مجاملة
انى شفت ناس هنا فى المنتدى ده ناس جميلة وواعية ومصريين صح ومحترمين وناس بتشتغل صح
اغلب اللى شفتهم هنا ده وصفهم عشان كده فرحان بيهم وفرحانين ببعض
وعلى راى مصرية الجميلة ليها تعبير جميل اوى بحبه
دايما فى اغلب مواضيعها تقول
الله لا يغيب منكم احد اخواتى
بحب الكلمة دى جدا وبتحسسنى بحنيتها علي اخواتها كلهم وانا طبعا منهم اوعو تنسونى

الأختيار جميل والكلمات معبرة عن واقع أليم
والفن رساله جميله تعبر عن واقه وعن مستقبل
ويحل أو ينتقض كثير من المشاكل الموجوده بالمجتمع
السلبيات هى مودوده دائما فى المجتمعات ولكن ليس مثل مجتمعنا الجميل
اللى اصبح معظمه سلبيات وأنا أرى أن السلبيات الموجوده لأننا أصبحنا نسير بلا أهداف
ومن لم يكن له هدف أبح هاوى والهاوى هو الذى يعمل للهوايه فقط يعنى محتاج فلوس يشتغل
جت الفلوس ينام على ما تخلص وأصبحت الجديه غير موجوده وحل مكانها الكسل وللآسف بنخرج
قوانيل أو لوائح علشان نتيح للسلبيات تكتر يعنى فى العمل لما الموظفين تبدأ تتأخر فى الصباح عن العمل
نجتمع علشان نشوف حل ونتخذ القرار ونقول كل موظف له مثلا ثلاث تصاريخ تأخير فى الشهر ومن هنا اصبح الواقع المر والسلبيات بلائحه وأحزن كثيرا عندما نتفنن فى السلبيات ونشد من أزر أنفسنا من أجل السلبيات يارب ابعدنا عن السلبيات لأنها ضعف فى الدين والأيمان والنفس وما يحزنى أكثر أن السلبيه أخرت كثيرا المجتمع العربى عن باقى المجتمعات التى لها أهداف ونحن بلا أهداف .
أختى الغاليه بتمنالك الخير كله وبشكرك على موضوعك وبشكر أخى سعيد على التحليل الجميل المقصل لفكر عالى وبشكر الرائعه أختينا سالمينا على روحة تحليلها وبشكر أخى فارس على ما أبدعه لنا فى هذا الموضوع وبشكره على أخر سطر بالموضوع والذى شبه فيه الأخت مصريه بحنيتها علآ أخواتها من الجنسين بالمنتدى ودا شى جميل أن نراه داخل بيتنا ربنا يوفقكم جميعا لما يحبه ويرضاه

اخى الغالى سعيد
ماشاء الله اخى شرحك وافى وجميل وافادنى جدااا
معاك حق اكيد
شكراا لمرورك اخويا الغالى ربى يسعدك

فااارس ياامشاغب الميس بتقولك ااهمد شوية هههههههههههه
كلامك اكيد جميل
والغنوة من كلمات الشاعر سيد حجاب اعتقد
وبيغنيها على الحجار بس مش عارفه الحان مين
وشكراا للفتتك الجميلة بجد
واكيد كل الناس هنا جميلة الحمد لله وهذا من فضل ربى
وانت اخ عزيز وغالى ومش ممكن ننساك ابداا بالعكس انا ازعل اوى لو اضطريت افارق اى حد منكم لا سمح الله
الله لا يغيبكم ابداا يارب
شكراا ليك فارس

اخى الغالى فتحى
كلامك منطقى والاغنية دى فعلا بتشرحه فى شكل راقى جميل بيعجبنى
وان شاء الله دائما التغيير للافضل
شكراا لكلامك الجميل اخى
اتمنى دائما تظل هذه الاسرة الجميلة موجودة بهذه القلوب البيضاء والفكر الواعى
وان شاء الله تكبر وتحقق كل املك فيها
احترامى لك اخى

سالمينا الجميلة تحليلك راائع مثلك حبيبتى
وعجبنى اوى كلامك ووصفك بكلمة الكاتب
فكرتينى بامتحان النصوص فى ثانوية عامة ههههههههههههه
لكن هو فيه حاجة مهمة اوى وهى ضمن السلبيات وانا اراها اهم السلبيات
وارى فيها مشكلة بلدنا الفعلية وللاسف هى غايبة عن كتير مننا
هى مشكلة الادارة
صعبه الحياة والحل بسيط... حبة تخطيط
للاسف نحن فاشلين اداريا
ويجب ان نعالج هذا العيب لانه اصل كل عيب فى بلدنا
شكرااا لمرورك حبيبتى واحيى فكرك الجميل وذوقك العالى

كلمات الاغنية بتوصف الحال بالظبط
للاسف بقى هو ده الحال
مفيش كلام ممكن يتقال بعد كدة
شكرا ليكى يا اختى الغالية
دائما متميزة

نورر الجميلة
فعلا بتوصف الحال بشكل كامل ومفصل وبتنتقد نقد ايجابى
لانها بتذكر المميزات مش بس العيوب
وكمان بتقدم الحل ببساطة وشكل عام
وكل ده من خلال عمل فنى مقبول
شكراا لحسن استيعابك اجمل نور وشكر لتواجدك غاليتى